TikTok қызметкерлері уланды

Сингапурда TikTok штаб-пәтерінде жаппай улану болды.

Бұл туралы BBC хабарлады.

30 шілде Сингапурда TikTok қосымшасы иелік ететін ByteDance компаниясының 60 қызметкері тамақтан улану белгілерімен медициналық көмекке жүгінді. 57 адам ауруханаға жатқызылды. Қызметкерлерде іштің ауруы, құсу, дене температурасының 38 градустан жоғарылауы, тері бозаруы мен суық тер белгілері болды.

Улануға кеңсе асханасында қызметкерлердің тұтынған тағамы себеп болған деген болжам бар. Сингапур билігі бұл оқиғаға қатысты санитарлық-эпидемиологиялық тексеру бастады. Алдын ала деректер бойынша қызметкерлер тұтынатын тағамдарда ішек таяқшасы бар болуы мүмкін. 

«Біз үшін қызметкерлеріміздің денсаулығы мен қауіпсіздігі өте маңызды. Қазіргі таңда төтенше жағдайлар қызметімен біріге отырып, зардап шеккен қызметкерлерге шұғыл түрде қолдау көрсету үшін бірқатар шаралар қабылдадық», - деді ByteDance өкілі.