The Washington Post Қазақстандағы «нағыз жұт» туралы жазды

Орталық Азия, атап айтқанда Қазақстанның оңтүстік-батысында бұрын соңды болмаған құрғақшылық салдарынан жем-шөп тапшылығы пайда болған. Жылқы өлекселері жан-жақта шашылып жатыр.

Бұл туралы Orda.kz The Washington Post америкалық газетіне сілтеме жасап хабарлады.

Жалғыз малмен күн көріп отырған шопандар малға жем-шөп, су таппай шығынға батқан. Себебі, үйдегі мал арам өле бастаған.

Америкалық басылым Батыс Қазақстанда тұратын 70 жастағы Ғабидолла Қалыңбайұлымен байланысқа шыққан. Ол осы жазда 20-ға жуық жылқысынан айрылған.

– Аман қалғанына азық жетіспейді, жеткілікті жем-шөп, су болмағандықтан, олар да аурушаң болып, жүдеп қалды, - деді ол.

Қазіргі таңда мамандар құрғақшылық тек Орталық Азия мен Қазақстанға төніп тұрған қауіп емес, ол бүкіл әлемді алаңдатып отыр дейді. Басты мәселе – жануарлар ыстыққа бейімделіп, өмір сүріп кете ала ма?

– Бізде жылу толқындары енді жиі болады және жағдай одан әрі нашарлай береді, - деді Австралия ұлттық университетінің ғалым-климатологы Нерили Абрам.

Ғалымдардың айтуынша, жылу толқындары тек қолайсыздық тудырып қана қоймай, адамдар мен жануарлардың өміріне де қауіп төндіреді.