Теріс діни ағымға жетелеген 5 радикал ұсталды

Терроризмге қарсы іс-қимыл аясында осы жылдың шілде-тамыз айларында ұлттық қауіпсіздік комитеті полиция органдарының және прокуратураның көмегімен Астана қаласында және Алматы, Батыс Қазақстан облыстарында бірқатар іс-шаралар өткізді. Нәтижесінде Қазақстанның 5 азаматы ұсталып, сот үкімімен қамауға алынды. 

Бұл туралы ҚР ҰҚК хабарлады. 

«Тергеу мәліметтері бойынша, олар терроризмді насихаттауға, діни алауыздық қоздыруға және террористік қызметті ұйымдастыру мақсатында адамдарды теріс діни ағымға тартуға қатысты. Олардың тұрғылықты жерлерін тінту кезінде қару — жарақ, оқ-дәрілер, діни әдебиеттер және өзге де заттай дәлелдемелер тәркіленді» деп хабарлады ҚР ҰҚК баспасөз қызметі. 

 Ведомствода атап өткендей, күдіктілердің екеуі кісі өлтіру, тонау және бұзақылық жасағаны үшін сотталған. Тағы біреуі бұрын шетелдік террористік лагерьлерде дайындықтан өтіп, шет мемлекет аумағындағы іс-қимылдарға қатысқан.

Аталған іс бойынша қылмыстық кодекстің 174, 256, 259-баптары бойынша сотқа дейінгі тергеп-тексеру жүргізіледі.

• 174-бап. Әлеуметтiк, ұлттық, рулық, нәсiлдiк, тектік-топтық немесе дiни алауыздықты қоздыру; 
• 256-бап. Терроризмдi насихаттау немесе терроризм актiсiн жасауға жария түрде шақыру; 
• 259-бап. Террористiк не экстремистiк әрекетті ұйымдастыру мақсатында адамдарды азғырып көндіру немесе даярлау не қаруландыру. 

Қылмыстық-процестік кодекстің 201-бабының 1-бөлігіне сәйкес, сотқа дейінгі тергеп-тексеру деректерiн жария етуге жол берілмейді.