Тергеу кезінде қайтыс болған жігіттің әкесі мәлімдеме жасады

8 желтоқсан Шымкент қалалық полиция департаментіне «ұрлық» бабы бойынша ұсталып келген күдікті тергеу кезінде көз жұмған. Марқұмның әкесі «оны ұрып, өлтіруі мүмкін» дейді.

Бүгін марқұмның әкесі Ерқара Жұмабаев Шымкент қалалық полиция департаментінің алдына келіп, Азаттық журналистеріне сұхбат берген. Оның айтуынша, полицейлер оның денсаулығына шағымданғанын алға тартқан. Бірақ әкесі ұлының жүрегі ауырғанына сенбей отыр, себебі ол спортпен шұғылданған.

Ерқара 30 жастағы марқұм ұлы Нұрболат Жұмабаевпен 8 желтоқсан күні сағат 12-лер шамасында бейнеқоңырау арқылы сөйлесіп тұрған кезінде полицейлер әкеткен.

– Баламмен күліп сөйлесіп тұрған едік. Бір топ адам «кісен салыңдар» деп ұстағанын көрдім. Өзі спортпен айналысады. Жүрегі ауырмайды. Қандай айыппен ұстағанын білмедім. Шымкентке үйленемін деп жүрген қызына келген. 17 желтоқсан күні той жасаймыз деп жоспарлап отыр едік, - дейді марқұмның әкесі.

Ұлын полицейлер әкеткеніне 4 сағат  өткен соң Ерқараға қаралы хабар келген. Күндіз ғана күліп телефонмен сөйлесіп тұрған ұлы көз жұмған. Сондай-ақ, бұған дейін «ұрлық» бабымен айыпталған Нұрболаттың денесі туыстарына берілмеген.

– Дәрігерлер барғанда биологиялық өлім болғаны анықталды. Неден қайтыс болғанын мамандар анықтап жатыр, - дейді қалалық денсаулық сақтау басқармасының баспасөз хатшысы Лаура Нақыпқызы.

Ал полиция бөлімінің бастығы Ералы Жұмаханбетов «тергеу амалдары жүріп жатқан кезде артық әңгімені неғыламыз» деп сараптама нәтижесін күтуге шақырды.

Журналистерге сұхбат беріп, артынша ұлының денесін көрген әкесі «оны біреу өлтіргеніне» сенімді екенін айтты. Бұған дейін Ерқара күмәнмен айтса, бұл жолы өз сөзін төмендегідей мысалдармен нақтылады.

– Денесінің сау жері жоқ. Қанталап кеткен. Басы, иығы, аяғы, арқасы. Көгергенде денесі қарайып кеткен. Камераға түсіруге рұқсат бермеді. Өздері түсіріп тұрды. Адвокат соққының іздері дейді. Ал аналар үндемей тұр, - деді Ерқара Жұмабаев.

Ал полиция бөлімінде мұндай мәлімдемеге еш жауап болмаған. Олар сараптама қорытындысын күтуге ниетті.