Тергеу абақтысына түнде Бишімбаевтың інісіне кім келді: ІІМ бейнекамераларды тексереді

Ішкі істер министрлігі Қуандық Бишімбаевтың інісі Бақытжан Байжанов отырған тергеу изоляторындағы бейнекамераларды тексереді.

Бұл туралы Мәжіліс отырысында Ішкі істер министрінің орынбасары Игорь Лепеха мәлімдеді.

«Бұл факті бойынша ҚАЖК Ішкі қауіпсіздік басқармасы тексеру жүргізіп жатыр. Нәтижесін хабарлап, жариялаймыз. Тексеріс жүргіземіз, бейнекамераларды қараймыз, егер бұл факті расталса, қорытынды шығарамыз» деді Игорь Лепеха.

Бақытжан Байжанов - Салтанат Нүкенованы өлтіру ісі бойынша екінші айыпталушы. Сот отырысында ол Бауыржан Мусин есімді азамат Қуандық Бишімбаев жағына шығуға көндіру үшін тергеу изоляторына қайта-қайта келгенін айтты.