Теңгенің неге күрт құлдырағаны белгілі болды

Қазақстан қаржыгерлер қауымдастығының сарапшылары 29 қыркүйек, дүйсенбі күні биржалық саудада теңге бағамының күрт құлдырауына ықпал еткен бірнеше себепті атады, деп хабарлайды Orda.kz.

АҚҚ-ның жаңа шолуында атап өтілген ақпаратқа зер салсақ, кеше өткен саудада доллардың құны 548,77 теңгеге жеткен. Бір тәулікте америкалық валюта 4,32 теңгеге қымбаттады. Бұл — айтарлықтай қымбат. Енді теңгенің бұдан әрі әлсіреуі мүмкін.

Сарапшылар ұлттық валютаның аяқ астынан әлсіреуіне ықпал еткен бірқатар факторларды атап өтті. Олардың пікірінше, қыркүйек айының соңында мұндай динамиканың болатыны анық көрінеді.

«Ұлттық валютаның әлсіреуі мұнай бағасы арзандауына, сондай-ақ ай соңында әдеттегідей шетел валютасына сұраныстың артуына байланысты болды. Бұл сұранысты импорттық келісімшарттарды төлеу және сыртқы қарызды өтеу бойынша міндеттемелерін орындайтын қазақстандық компаниялар қалыптастырады. Айта кетейік, теңгенің шамадан тыс әлсіреуі импорттық тауарлардың қымбаттауына және инфляциялық үдерістердің күшеюіне алып келуі мүмкін», — дейді АҚҚ өз есебінде.

Ұлттық банктің 30 қыркүйектегі ресми бағамы — 548,79 теңге. Әдетте биржада америкалық валюта бұдан сәл жоғары бағамен саудаға түсетінін ескерсек, айдың соңғы күні доллар бағамы 550 теңге межесінен асуы мүмкін.

Kurs.kz сайтының дерегінше, 30 қыркүйекте Алматыдағы айырбастау пункттерінде доллар 547,7–550 теңге аралығында сатылып жатыр. Ал Астанада бағам әлдеқашан 550 теңгеден асып кеткен. Елордадағы көптеген айырбастау орындарында 1 долларды 551 теңгеден сатып алуға болады.