Теміртаулық журналист Гусевке үкім шықты

Алматы қаласының Алатау аудандық сотында Қазақстан Республикасы Қылмыстық кодексінің 147-бабының 5-бөлігі («Жеке өмірге қолсұғылмаушылықты және дербес деректер мен оларды қорғау туралы ҚР заңнамасын бұзу») бойынша айыпталған Олег Гусевке үкім шықты, деп хабарлайды Orda.kz. 

Гусев 2023 жылдың тамыз айында «Кенжехан» базарының жаңа иелері мен жалға алушылар(саудагер) арасындағы қақтығыс туралы мақала жазған. Сол кезде журналист Елена Сәуақасованың жеке және отбасылық құпиясын жариялаған.

Айыптау тарапының пікірінше, Гусев бұл әрекетті жәбірленушінің іскерлік беделіне нұқсан келтіру және қоғам алдында жағымсыз бейне қалыптастыру мақсатында қасақана жасаған. Журналист өзіне тағылған барлық айыптауларды жоққа шығарып, жәбірленуші туралы ақпаратты сот кабинеті жүйесіндегі ашық дерекқордан алғанын мәлімдеген.

Сот Гусевті кінәлі деп танып, оған төрт жыл алты ай мерзімге бас бостандығынан айыру және үш жылға журналистік қызметпен айналысуға тыйым салу жазасын тағайындады. Алайда судья рақымшылықты ескеріп, нәтижесінде Теміртаудан шыққан журналистке үш жыл шартты түрде бас бостандығынан айыру жазасы берілді.

Айта кетейік, 17 жастағы мүгедек қызды зорлауға оқталған Үндістаннан келген студент ұсталды.