Теміртауда дәрігерлер қансыраған науқасқа көмек көрсетпеді

Желіде Теміртау ауруханасында орын алған келеңсіз жағдайдың видеосы тарады. Оны қоғам белсендісі Мұрат Әбенов жариялады.

Видео авторының айтуынша, досы қолын кесіп алып, ауруханаға келген.

«Қолды тігу керек болды, ал дәрігерлер: «Күте тұрыңыз, түскі ас уақыты» деді. Бұл –  біздің қаланың дәрігерлері. Ар-ұждан, ұят жоқ» дейді камера ұстаған азамат.

Қарағанды облыстық Денсаулық сақтау басқармасы оқиғаға қатысты түсініктеме берді.

Бөлімнің айтуынша, оқиға 23 маусымда Теміртаудағы жекеменшік («МЦ «Будь здоров» ЖШС) емханалардың бірінде болған.

«Науқастарды қабылдау кестесіне сәйкес емхана хирургы сағат 14:00-ден бастап жұмысын бастайды. Науқас ол жоқ кезде шұғыл медициналық көмекке жүгінген. Жедел медициналық көмек уақтылы көрсетілмегендіктен, медбике сөгіс түріндегі тәртіптік жауапкершілікке тартылды. Емхананың дәрігерлік кеңесінде жағдай жан-жақты зерттелді. Тиісті ұйымдастырушылық және басқарушылық қорытындылар жасалады» деп жазылған ресми хабарламада.