Теміртауда автобустағы жанжал пышақ жарақатымен аяқталды

Автобуста жанжал шығып, салдарынан 18 жастағы жігіт аяғынан пышақ жарақатын алды. Оқиға орнынан түсірілген кадрларды куәгерлер әлеуметтік желілерде жариялады, деп хабарлайды Orda.kz.

Алдын ала мәлімет бойынша, жанжал №107 бағыттағы автобуста болған. Қақтығыс тұрмыстық жағдайдан туындаған: жолаушылардың біреуі салондағы желдеткіш терезені ашпақ болған, бұл екінші жолаушының наразылығын тудырған. Ауызша сөз талас төбелеске ұласып, ақыры пышақ қолданылған.

Жарақат алған азаматта қатты қан кете бастағанда жүргізуші автобусты тоқтатып, оқиға орнына полиция мен жедел жәрдем шақырылған. Дәрігерлер келгенге дейін жолаушылар қолда бар құралдармен жараны таңып, алғашқы медициналық көмек көрсеткен.

Оқиға орнына келген полиция қызметкерлері 30 жастағы күдіктіні ұстады. Ол уақытша ұстау изоляторына қамалды. Аталған факті бойынша қылмыстық іс қозғалды.

Қарағанды облысы полиция департаментінің хабарлауынша, қазіргі уақытта барлық қажетті тергеу әрекеттері жүргізіліп жатыр. Тергеу барысы ведомствоның бақылауында.