Темекі тұқылын жегізген: Ақтөбеде сарбаздарды қорлаған сержант сотталды

Ақтөбе гарнизонының әскери соты Ақтау әскери бөлімінің 42 жастағы сержантын қол астындағыларға қатысты өкілеттігін асыра пайдаланғаны үшін кінәлі деп тапты, деп хабарлайды Orda.kz ақпарат агенттігі «Диапазон» сайтына сілтеме жасап.

Іс материалдарына сәйкес, медициналық ротаның аумағын тазалау кезінде сержант темекі тұқылын тауып алып, екі әскерге шақырылғанға оны жегізген. Кейін сарбаздардың бірі уланғанына шағымданып, медициналық пунктке барған.

Жатақханадағы тәртіпсіздікке ашуланған сержант келесі күні қатардағы жауынгерлерді бірнеше рет ұрған.

Сотта ол тәртіпсіздік үшін ескерту ғана бердім деп, кінәсін мойындамады. Бірақ ол билігін асыра пайдаланғаны үшін кінәлі деп танылды. Сот оны екі жылға бас бостандығын шектеу жазасына кесіп, жыл сайын 100 сағат мәжбүрлі жұмысқа тартуға міндеттеді.

Бұған дейін Қорғаныс министрлігі еліміздің армиясында әлімжеттік жоқ, тек «әскери тәртіп бұзу» ғана бар деп мәлімдеген болатын.