«Темекі тартпа» деген сөз үшін жүргізушіге пышақ сұқты

Қостанайда әйел «көлікте шылым шекпеңіз» деген ескерту үшін жүргізушіге пышақ сұқты, деп хабарлайды Orda.kz.

«Наша газета» - ның мәліметінше, Бейімбет Майлин ауданының соты Р. есімді азаматшаны жеңіл дене жарақатын қасақана келтіріп, бұзақылық ниетпен әрекет етті деп айыптады.  

Оқиға Тобыл кенті маңындағы Қостанай-Қарабұтақ тас жолында болған. Сот материалдарына сәйкес, Р. Лисаковск қаласына жету үшін көлік тоқтатқан. Жүргізуші Л. әйелді жеткізуге келісіп, көліктің жолаушы орнына отырғызады. Автокөлікте оның жанында кәмелетке толмаған М. есімді бала да болған екен. 

Жол үстінде Р. электронды темекі шеге бастағанда, жүргізуші оған көлікте шылым шегуге болмайтынын ескерткен. Сол сәтте әйел сөмкесінен ас үй пышағын алып, ер адамның мойын тұсына соққы жасаған. Жүргізуші көлікті тоқтата бастағанда, Р. тағы бір рет соққы жасауға әрекеттенген. Сот-медициналық сараптама жәбірленушінің мойын тұсынан пышақ кескен жарақат алғанын растады.  

«Айыпталушы өз кінәсін толық мойындаған.  Сот жаза тағайындау кезінде шын жүректен өкінуді жеңілдететін жағдай, ал мас күйінде қылмыс жасауды ауырлататын жағдай деп таныды»,  деп мәлімдеді облыстық соттың баспасөз қызметі.

Нәтижесінде сот  Р.-ға 1 жыл 6 айға бас бостандығын шектеу жазасына кесіп, осы уақыт аралығында пробациялық бақылау белгіледі.