Өтемұратов: Мен үшін беделім мен адал атым әрқашан бірінші орында

Қазақстандағы ең бай адамдардың бірі, бизнесмен Болат Өтемұратов Британ сотының активтерін бұғаттау туралы шешімі күшін жойғанына байланысты түсініктеме берді. Оның түсініктемесі өзіне тиесілі Informburo.kz сайтында жарияланды.

Сайт жариялаған қысқаша хабарламада Өтемұратов өзі үшін "беделі мен адал аты әрқашан бірінші орында тұратынын" айтқан.

"Мен ағылшын сотының менің активтеріме шектеу қою туралы шешімінің күшін жойғанына және "БТА банкінің" арызды қайтарып алғанына қанағаттанамын. Біздің заңгерлер тобы қысқа мерзімде менің бұл іске қатысым жоқтығына дәлел болатын негізгі айғақтарды жинау бойынша жұмыс жүргізді. Мен үшін беделім мен адал атым әрқашан бірінші орында. Осы қиын–қыстау кезеңде мені қолдаған барлық адамға – менің отбасыма, достарыма, серіктестеріме, компаниялар тобының ұжымына және бей-жай қарамайтын барлық адамға алғысымды білдіргім келеді" деді Өтемұратов.

Бүгін Ұлыбритания сотының Өтемұратовтың активтерін бұғаттау туралы шешімі күшін жойған. Оған Өтемұратов пен БТА банк өкілдері арасындағы келіссөздер нәтижесінде қол қойылған «құпия келісім» себеп болған.