Тексеру барысында «Өзенмұнайгаз» АҚ қызметінен 160 заң бұзушылық табылды

Акционерлік қоғамның өндірістік құрылымдық бөлімшелерінің қаржы-шаруашылық қызметін тексеруді арнайы жұмыс тобы жалғастыруда.

Жаңаөзенде «ҚазМұнайГаз» ҰК» АҚ арнайы тобы жұмысын жалғастыруда. Есепке сәйкес, қазірдің өзінде экономикалық қызметтің 55 нысаны, оның ішінде «Өзенмұнайгаз» АҚ-ның 17 өндірістік құрылымдық бөлімшесі, сегіз мұнай кәсіпшілігі сервистік ұйымы және 30 үшінші тарап мердігер ұйымы талдаудан өткен.

«Өзенмұнайгаздың қаржылық-шаруашылық қызметін тексеру барысында алдын ала 160 бұзушылықтар мен сәйкессіздіктер анықталды, оның ішінде:

Қазақстан Республикасының заңнамасына сәйкес жауап алу үшін құқық қорғау органдарына жеті факті жіберілді:

10 факті бойынша қызметтік тергеу жүргізілуде;

101 факті бойынша жауапты тұлғаларға тәртіптік жаза қолданылатын болады.

Құқықбұзушылық фактілері бойынша келтірілген залал мөлшері іс жүргізу және реттеу шараларының қорытындысы бойынша анықталады» делінген арнайы топ таратқан хабарламада.

Құқық қорғау органдарымен бірлесе жұмыс жүргізіліп жатқаны нақтыланды. Анықталған заңбұзушылықтар туралы жедел түрде прокуратура мен полиция органдарына хабарланады, олар өз кезегінде өз қызметтеріне сәйкес әрекет етеді.

«Олар тергеу әрекеттері мен шараларды жүргізіп жатыр, сондай-ақ  кеше «Өзенмұнайгаз» бас директорының орынбасарын Экономикалық тергеу департаменті ұстады», - деді ҚМГ басқарма төрағасының орынбасары, арнайы жұмыс тобының жетекшісі Дәулетжан Хасанов.

Ол комиссияның жұмысы әлі аяқталмағанын, көптеген фактілер бойынша қызметтік тексерулер жүргізіліп жатқанын түсіндірді.