Теңізге шығар жолы жоқ елдер министрлері онлайн кездесті

БҰҰ Бас Ассамблеясының 76-шы сессиясында Қазақстан Сыртқы істер министрі Мұхтар Тілеубердінің төрағалығымен Теңізге шығар жолы жоқ дамушы елдер тобының министрлік отырысы онлайн режимде өтті.

БҰҰ Бас Ассамблеясы 76-шы сессиясының төрағасы Абдулла Шахид және БҰҰ-ның ең осал дамушы елдерге арналған Жоғары өкілі Кортни Раттрэй қатысушыларға құттықтау жолдады.

Отырысты ашқан Мұхтар Тілеуберді пандемиядан неғұрлым зардап шеккен осал елдер тобына халықаралық әріптестер мен донорлардан қолдау қажет екенін атап өтті. Қазақстан 2020-2021 жылдарға арналған ТШЖДЕ тобының жаһандық төрағасы ретінде, екі жыл бойы барлық тиісті халықаралық алаңдарда топ елдерінің мүдделерін қорғады.

Кездесу қорытындысы бойынша Министрлік декларациясы қабылданып, Қазақстан бастамасымен  осы топтағы елдердің әлемдік нарықтан алыстығы және транзиттік елдерге тәуелділігіне байланысты проблемаларды шешуді жеделдету жөніндегі Жол картасын іске асыру қаралды. Бұл құжат 2024 жылға дейінгі кезеңде осы міндеттерді жедел іске асыру үшін барлық мүдделі тараптардың күш-жігерін біріктіруге ықпал етеді.

Аталған шараға 85-тен астам делегат, оның ішінде 32 елдің сыртқы саяси ведомстволар басшылары, ЮНИДО, ФАО, ЮНКТАД, АзТМЭӘК, МОМД, ДСҰ, ЕЭК және т.б. сияқты БҰҰ халықаралық ұйымдары мен агенттіктерінің басшылары қатысты.

Кездесу аясында 2022-2023 жылдарға ТШЖДЕ тобының келесі төрағасы Ботсвана сайланатындыға айтылды.