Тбилисиде тұтқындау басталды: арнайы жасақ резеңке оқ пен газ қолданды

Тбилисиде полицейлер грузин парламенті маңында шетелдік агенттер туралы заңның қабылдануына қарсы шерушілерді су атқыштары, резеңке оқ және бұрыш газын қолданып тарата бастады, деп хабарлайды Orda.kz.

30 сәуір күні кешке Грузия парламенті ғимаратының жанында оппозиция митингі басталды. Митингке Грузия мен Еуроодақ елдерінің туларын көтеріп келгендер көп болды.

Rustavi 2 атап өткендей, демонстранттар мен қауіпсіздік күштері арасында «физикалық қақтығыс жүріп жатыр». Сонымен бірге полиция қызметкерлері демонстранттарды тұтқындады, ал қалған шерушілер оларға қарсылық көрсетіп, оларға бөтелке лақтырды.

Зардап шеккендердің арасында үш полиция қызметкері бар, деп хабарлайды Грузия денсаулық сақтау министрлігі.

Грузия президенті Саломе Зурабишвили ішкі істер министрі Вахтанг Гомелауриді Тбилисидегі шеруді таратуды тоқтатуға шақырып, шетелдік агенттер туралы заңға қарсы өтіп жатқан наразылықты бейбіт деп атады.