Тауда от жаққан  туристер 2 миллионнан астам айыппұл төледі

Іле-Алатау ұлттық саябағында от жаққан  туристер 2 миллион теңгеден астам айыппұл төледі.

Бұл ретте небәрі үш күннің ішінде айыппұл сомасы 690 мың теңгені құрады, деп хабарлайды Алматы қаласы Төтенше жағдайлар департаментінің баспасөз қызметі.

Өрт қаупі кезеңі басталғаннан бері Іле-Алатау ұлттық табиғи саябағында демалатын туристерге қатысты өрт қауіпсіздігін сақтамағаны  үшін ҚР ӘҚБтК-нің 505 бабы бойынша 13 әкімшілік хаттама толтырылды. Демалушылар Қазақстан Республикасы ӘҚБтК-нің 367-бабы бойынша ескерту және алты әкімшілік хаттамамен – 2 млн.теңгеден астам сомада айыппұл салу түрінде жазаланды.

«Қазақстан Республикасы ӘҚБтК-нің 367-бабының 3-бөлігінде көзделген ормандарда, ерекше қорғалатын табиғи аумақтарда өрт қауіпсіздігі талаптарын және санитарлық ережелерді бұзу, жеке тұлғаларға бір жүз айлық есептік көрсеткіш мөлшерінде айыппұл салуға әкеледі, ол – 345 000 теңге» деді министрлік.

Алматыда жоғары өрт қаупі сақталуда, сондықтан ТЖД күштері таулы орман алқаптарында өрттің алдын алуға және оның алдын алуға бағытталған кешенді іс-шараларды жүргізуде.

Алматы қаласының Төтенше жағдайлар департаменті таулы орман алқабына барған кезде өрт қауіпсіздігі ережелерінің талаптарын сақтау қажеттігін еске салады:

• от жағуға болмайды, тамақ пісіру үшін мангалдарды және басқа құрылғыларды қолданбаңыз;

• сөндірілмеген темекі қалдырмаңыз;

• бөтелкелерді, әйнек сынықтарын, басқа да тұрмыстық қалдықтарды күн сәулесі түсетін жалпақ алаңқайда қалдырмаңыз және шөпті күйдірмеңіз.