Таулы Қарабақтың бұрынғы президенті халықаралық іздеуге жарияланды

Мойындалмаған Таулы Қарабақ Республикасының бұрынғы президенті Арайик Арутюнян мен бұрынғы қорғаныс министрі Жалал Арутюнян халықаралық іздеуге жарияланды.

Trend агенттігінің хабарлауынша, бұл туралы Әзірбайжанның бас прокуроры Камран Әлиев мәлімдеген.

Оның айтуынша, Арутюняндар экс-президенттің көмекшісі Давид Бабаянмен бірге Гянджаның бейбіт тұрғындарына зымырандық шабуыл жасағаны және екінші Қарабақ соғысы кезінде бейбіт тұрғындарға қарсы қылмыс жасағаны үшін іздеуде болған.

«Олардың бірі қазірдің өзінде қамауға алынды, тергеу жүріп жатыр. Әзірбайжан жұртшылығы жақын арада толық ақпарат алады» деді Камран.

28 қыркүйекте Таулы Қарабақ Республикасының 2024 жылға дейін өмір сүруін тоқтататыны белгілі болды. Бір күн бұрын Әзірбайжан Таулы Қарабахтың бұрынғы басшысы Рубен Варданянды тұтқындады.

Қолда бар соңғы деректерге қарағанда, Таулы Қарабақтан Арменияға 100 мыңнан астам адам көшкен. Мойындалмаған республикада барлығы 120 мыңға жуық этникалық армян өмір сүрді.