Тәуелсіз «Orda» басылымына тағы да шабуыл жасалды: Instagram мен Facebook бұғатталды

Біздің редакциямызға жасалған ақпараттық шабуылдар толастамай тұр. Редакцияға ғана емес, бас редакторды да түртпектеп, түрлі қитұрқы әрекеттер жасалып жатыр, деп хабарлайды Orda.kz.

«Orda» редакциясының Instagram және Facebook-тағы парақшалары тағы да бұғатталды. Бас редактор Гүлнәр Бажкенованың жеке парақшасы да бұғатталды. Бұл соңғы бірнеше айда болып жатқан қысымның тағы бір толқыны. Біз әлеуметтік желілерде парақшаларды бұғаттау, жалған ақпарат тарату, жалған аккаунттар арқылы шабуыл жасау сынды ақпараттық қысымның түр-түрін көрдік. Журналистеріміздің атынан жалған парақшалар ашылып, жеке деректері мен хабарландырулар жарияланып жатыр.

Мұның бәрі оларды қорқытуға, беделін түсіруге және арандатуға бағытталған. Осы қитұрқылықпен қатар, баса-көктеп кіруге де талпыныс бар. Жақында біздің кеңсеміздің мекенжайын көрсетіп, балалар лагеріне тегін жолдама беріледі деген жалған хабарландыру таратылды. Соның салдарынан ондаған адам ғимарат алдына жиналды. Олар алданғандарын түсінгеннен кейін үйлеріне қайтты.

Редакцияның сайтына тосқауыл қою үшін әлдекімдер барын салып жатыр. Хакерлік шабуылдан кейін техникалық ақаулар болды.