Тарихи Ройямонт аббаттығында жаһандық білім шарасы

Өткен демалыс күндері Париж маңындағы XIII ғасырлық Ройямонт аббаттығында жаһандық білімді қолдау шарасы ерекше салтанатпен өтті, деп хабарлайды Orda.kz.

Орта ғасырлардан сыр шерткен бұл тарихи орында әлемнің түкпір-түкпірінен жиналған үш жүзге жуық жұлдыз, саясаткер, дипломат және өнер қайраткері білім беру мәселелерін талқылауға жиналды. Шараның негізгі мақсаты – білім маңыздылығын арттырып, заманауи өнер мен жаңа технологиялар рөліне назар аудару.

Шара модераторы ретінде жаһандық ықпалды тұлға, әлемдегі ең беделді 100 әйел инфлюенсердің бірі Линда Перейра сөз алып, қатысушылардың пікір алмасуына бағыт берді. Екі күнге созылған бұл жиында білім беру саласының өзекті мәселелері мен болашақ даму жолдары жан-жақты қарастырылды.

Шараның басты бөлімі ретінде гала-кешкі ас және қайырымдылық аукционы ұйымдастырылды. Оған белгілі тұлғалар – журналист әрі жазушы Марек Хальтер, «Алтын глобус» фестивалінің директоры Хелен Хон, танымал модель Сабрина Эльба, актриса Элла Траволта, әлеуметтік желі жұлдызы Санта Димопулос және Франция Олимпиадасының танымал опера әншісі Аксель Сен-Сирель сияқты әйгілі қайраткерлер қатысты.

Аукцион барысында көрермендерге жас суретшілер мен дизайнерлердің туындылары ұсынылып, ерекше өнер туындылары үлкен қызығушылыққа ие болды. Айрықша атап өтерлігі, суретші Бубу тірі раушан гүлдерін қолданып, кенепте ерекше перформанс көрсетті, бұл оның шығармашылығына тән бірегей стиль көрінісі болды.

Сондай-ақ, шарада Қазақстан журналистер одағының мүшесі, продюсер әрі сценарист Элизабет Крецтің «Art in you» атты қысқаметражды фильмі көрсетілді. Фильм білім беру инклюзивтілігін көтеріп, дамушы елдердегі білімнің маңыздылығын айшықтайды. Бұл жұмыс арқылы автор халықаралық ұйымдардың білім саласын дамытудағы рөлін көрермендерге жеткізуге тырысты.

Аукционнан түскен қаражаттың барлығы БҰҰ-ның білім беру саласындағы қайырымдылық бағдарламаларын қолдауға бағытталмақ. Ұйымдастырушылар бұл шараның жыл сайын дәстүрге айналуын жоспарлап отыр, ал келесі жылы бұл іс-шара үшін тарихи маңызы зор тағы бір архитектуралық нысан таңдалмақ.