Тарихи өзгеріс: Түркия Орталық Азияны Түркістан деп атамақ

Түркияның ұлттық білім министрлігі тарих пәнінің оқу бағдарламасына негізгі өзгерістер енгізілетінін жариялады. Ол бойынша «Орталық Азия» термині «Түркістан» деп аталатын болады, деп хабарлайды Orda.kz.

TRT Haber порталының мәліметтеріне сүйенсек, бұл қадам Түркия президенті Режеп Тайып Ердоғанның қолдауымен, жастар арасында ұлттық сананы және патриотизмді нығайтуға бағытталып отыр.

«Біз алдағы кезеңді Түркілер дәуірі ретінде қарастыру үшін Түркия дәуірі көзқарасын түркі мемлекеттері ұйымына таратып жұмыс істейміз», — деді Ердоған.

Түрік профессорлары, соның ішінде профессор Ахмет Ташағыл бұл шешімді қолдап, «Түркістан» терминінің тарихи маңыздылығын атап өтті. Олар бұл сөздің «түркілердің Отаны» дегенді білдіретінін және оның тарихтың ең ерте кезеңдерінен бастап қолданылғанын айтты.

«Түркістан тұжырымдамасына жүгінуіміз және оны ұлттық білім министрлігінің оқулықтарына енгізу - өте дұрыс шешім. Түркия мен Түркістан, негізінен түркілердің тұратын аймағын білдіреді», — деді доцент Рамин Садық.

Сарапшылар бұл өзгерістің түркі әлемінде жалпы тарих, әдебиет, карта және әліпби құрудағы белсенді қадамдарына байланысты екенін атап өтті.