«Тарихи мұра»: ҚазҰУ археологтары ежелгі қоныстарды тапты

Әл-Фараби атындағы Қазақ ұлттық университетінің археологтары Алматы облысынан сақ-үйсін дәуірінің қоныстарын тапты.

 Бұл туралы ҚР ғылым және жоғары білім министрлігі хабарлады.

Зерттеу барысында сақ-үйсін дәуірінің ежелгі қоныстары, соның ішінде бірнеше тұрғын үй табылды. Жобаны PhD Ринат Жұматаев басқарды. Жобаға профессор, АҚШ-тан келген белгілі археолог Клаудия Чанг (Claudia Chang) қатысты. Оның жетекшілігімен Белбұлақ қонысы зерттелді. Бұл қоныс үйсін дәуіріне жатады.

Биылғы дала маусымында археологтар бірнеше тұрғын үйдің орнын тапты. Табылған заттардың ішінде қыш бұйымдарының сынықтары және түрлі жануарлардың сүйектері бар. Бұл осы жерлерді мекендеген ежелгі халықтардың мәдениеті мен тұрмысын зерттеуде жаңа мәліметтерді білуге көмектесетіні анық.

Еске сала кетейік, бұл ғылыми-зерттеу экспедициясы Қазақстан Республикасы Ғылым және жоғары білім министрлігінің Ғылым комитеті ұсынған "Қазақстанның оңтүстік-шығыс және шығыс аймақтарының мәдени мұрасын археологиялық және тарихи-этнографиялық зерттеу" жобасы аясында жүзеге асырылып отыр.