Таразда зират ішіне жасырылған қару-жарақ табылды

Тараз қаласының полицейлері зиратқа жасырылған қару-жарақтарды тауып алды. Полиция басқармасының қызметкерлері ұлттық ұлан әскери жасақ қызметкерлерімен бірлесіп, қала аумағында жоғалған атыс-қаруларын іздестіріп жатыр.

Polisia.kz ақпаратына сәйкес, полиция қызметкерлерімен қаланың барлық қараусыз қалған нысандары, мөлтек аудандардың жертөлелері мен шатырлары тексеріліп жатыр.

– Қылмыскерлер ұрланған қаруды тіпті қала аумағындағы зираттарға жасырып қойған. Қызметтік иттер де іздеу жұмыстарына қосылған. Иіс сезгіш иттер полиция қызметкерлеріне қару мен оқ-дәрілерді тезірек табуға көмектеседі, - дейді Жамбыл облысы ПД баспасөз қызметінің жетекшісі Гүлсара Мұхтарқұлова

Табылған қару сот-баллистикалық сараптамаға жіберілді.

Қаңтар айында Таразда болған оқиға кезінде ПД қоймасынан 205 қару ұрланған, деп хабарлайды ІІМ.