Тараздағы жарылыс: ТЖ қызметкері ота жасатуға Түркияға кетті

Жамбыл облысы Байзақ оқиғасында жарақат алған төтенше жағдайлар қызметкерлерінің бірі ота жасатуға Түркияға кетті.

Жамбыл облысы Азаматтық қорғау майоры, ТЖД Кадр саясат басқармасының басшысы Алмаз Жұматаев Байзақ жарылысы кезінде жарақат алған қызметкерлердің жағдайы туралы айтып берді.

– Байзақ ауданында 26 тамызда болған өрт пен жарылыс оқиғасынан кейін 48 қызметкер әртүрлі жарақат алды. 10 адам қаза тапты. Сол 48 қызметкердің 8-і жұмысқа кірісті. Олар 1 жыл сайын еңбек демалысына шығып тұрады.

Қазіргі уақытта қызметкерлердің біреуі өз еркімен Қырғызстан елінде жарақатына байланысты ем алып жатыр. Бізде оған қажетті ота жасайтын білікті маман табылмады. Сондықтан, Тұрсынов Алмас көзінің жарақатына байланысты Түркия еліне бара жатыр, – деді басқарма басшысы.

Қырғызстан мен Түркияға кеткен қызметкерлер қор қаражатына емделуде.

– Бізде қайтыс болғандар мен жарақат алғандарға арналған қор бар. Қайтыс болғандардың отбасыларына 5 миллионнан аудардық. Бұл қорға тек Төтеншеліктер емес басқа да мекемелердің ішкі істер қызметкерлері, Ұлттық ұланның әскери бөлімдері көмегін көрсетті. Қанша қаражат жиналды соның барлығын қорға жіберілді. Ол қорды министрдің өзі бақылап отырады.

Біразына еңбекке уақытша жарамсыздық парақтары берілген, олар Ішкі істер министірлігінің Жамбыл облысы бойынша полиция департаментінің госпиталында емделді. Әр қызметкерге жарақатына байланысты  дәреже берілген. Мысалы Тұрсыновқа 5 миллион берілді, – деді Алмаз Жұматаев.

Күрделі жарақат алғандарға 900 мың теңгеден берілді. Орташа жарақат алғандарға 600 мың теңгеден, жеңіл жарақат алғандарға 300 мың теңгеден берілді. Жалпы 92400000 теңге үлестіріліп берілді.

Исламбек Дастан