Таразда жарылған әскери базада 500 тонна тротил болған

Төтенше жағдай министрлігінің ресми өкілі Талғат Уәли Жамбыл облысындағы әскери бөлімнің жарылған оқ-дәрілер қоймасында 500 тоннаға жуық тротил сақталғаны туралы айтты.

Бұл туралы Orda.kz хабарлады.

- Қойма ғимараты барлық алаң бойынша (697 шаршы метр) жанды. Фрагменттердің ұшу радиусы екі шақырымға дейін болды. Алдын ала мәліметтер бойынша қоймада 500 тоннадан астам тротил сақталған, — деп хабарлады ТЖМ ресми өкілі Талғат Уәли.

Оның мәліметінше, қойманың жанында үш елді мекен бар: Жібек жолы, Үшбұлақ және Ботамойнақ. Жалпы халық саны – 1086 адам. Қазір Тараз қаласына 710 тұрғын көшірілді. Олар Жамбыл политехникалық колледжінде, Теміржол колледжінде, Қазақ-Түрік колледжінде, Тараз сервис және технология колледжінде, қант-зауыт колледжінде, №5, 6, 10, 44, 23, 9, 12, 8, 54 және 53 мектептерде.

ТЖМ алдын ала ақпараты бойынша, ауруханаға 90-ға жуық зардап шегуші түскен, оның 49-ы-ТЖД қызметкерлері. Ресми мәліметтер бойынша, төрт адам қайтыс болды.