Тараздағы жарылыс: министрлік қате ақпарат берген

Министр Юрий Ильин Қорғаныс министрлігі жарылыс болу мүмкіндігінің жоқтығы туралы құтқарушыларға қате ақпарат бергенін айтты.

Бөлімше басшылығы өрт сөндірушілер мен құтқарушыларға тротилден басқа жарылғыш заттар туралы хабарламаған. Бұл туралы министр Юрий Ильин Жамбыл облысы Байзақ ауданында тамыз айының соңында болған қайғылы оқиғаға қатысты айтты.

Оның айтуынша, қаза тапқан 17 адамның 10-ы Төтенше жағдайлар министрлігінің жеке құрамы. Іздеу жұмыстары әлі жалғасып жатқан бір адам – Қорғаныс министрлігінің қызметкері.

Төтенше жағдайларды жоюға шығатын өрт сөндірушілердің міндеті өртті жою және оның таралуына жол бермеу екенін баса айтты.

«Өрт сөндіру пунктіне шықпас бұрын, ең алдымен, барлау жұмыстары жүргізіліп, нысан басшылығына жарылыс қаупі бар-жоғы сұралады. Бұл нысанда, оның ішінде мекеме басшылығы мен Қорғаныс министрлігі жоғары температурада жай ғана жанып кететін және жарылаты тротилді сақтаумен қатар, ешқандай қауіп төніп тұрған жоқ деп айтқан» деді Төтенше жағдайлар министрі Мәжілістегі үкімет сағатында.

Сондай-ақ қазір Ішкі істер министрлігі тергеуді жалғастырып, Төтенше жағдайлар министрлігі қызметкерлері жарылыстың себептері мен салдарын анықтауға көмектесіп жатқаны атап өтілді.

Еске салсақ, 26 тамызда Жамбыл облысы Байзақ ауданы Қайнар ауылында Қорғаныс министрлігі әскери бөлім аумағында оқ-дәрі қоймасынан өрт шыққан болатын. Салдарынан 17 адам қаза болды.