Таразда ТЖМ медицина орталығының қызметкерлері пара алғаны үшін сотталды

10 қыркүйек күні Тараз қалалық соты №2 Жамбыл облысы Төтенше жағдайлар министрлігіне қарасты «Апаттар медицина орталығы» филиалының уақытша басшысы А.О. Махашева мен кадр инспекторы Л.Т.Қалмұратоваға үкім шығарды, деп хабарлайды Orda.kz.

Сыбайлас жемқорлыққа қарсы іс қимыл агенттігінің мәліметтеріне сүйенсек, олар фельдшер қызметіне жұмысқа орналастыру үшін ірі көлемде пара алғаны үшін кінәлі деп танылды. Махашева 4 жылға бас бостандығынан айырылса, Қалмұратова 3 жыл 6 ай мерзімге сотталды. Сонымен қатар, екеуі де мемлекеттік қызметте және квазимемлекеттік секторда қызмет ету құқығынан өмір бойына айырылды.

Алайда, кішкентай балаларының болуына байланысты сот ҚР Қылмыстық кодексінің 74-бабының 1-бөлігіне сәйкес жазаны өтеу мерзімін 4 жылға кейінге шегерді.

Үкім заңды күшіне енген жоқ.