Таразда тәркіленуге тиіс мүлікті жасырға кәсіпорынның бұрынғы директоры сотталды

Тараз  прокуратурасы мемлекет пайдасына тәркіленген жалпы сомасы 110,2 млн теңгенің мүлкін жасыру фактісін анықтады.

Бұған дейін Тараздың мамандандырылған әкімшілік сотының қаулысымен ASCO Pro ЖШС-нен 110,2 млн теңге сомасындағы алкогольдік өнімдер тәркіленген.

Алайда мекеменің бұрынғы басшысы тәркіленген тауарларды жасырған.

Осы факті бойынша Тараз прокуратурасы Қылмыстық кодекстің 425-бабы ("Тізімдеме жасалған немесе тыйым салынған не тәркілеуге жататын мүлікке қатысты заңсыз әрекеттер") бойынша қылмыстық істі тіркеді.

Тараздың № 2 сотының 2024 жылғы 7 наурыздағы үкімімен ASCO Pro ЖШС-ның бұрынғы басшысы Қылмыстық кодекстің 425-бабының 2-бөлігі бойынша кінәлі деп танылып,  4 жыл мерзімге кез келген меншік нысанындағы ұйымдарда басшылық қызметтерді атқару құқығынан айыра отырып, 1 жыл 3 айға бас бостандығынан айырылды.

Сондай-ақ сотталғаннан мемлекет пайдасына 110,2 млн теңге көлемінде материалдық шығын өндірілді.

Үкім заңды күшіне енген жоқ.