Таразда сот топтасып қыз зорлаған жасөспірімдердің жазасын ауырлатты

Таразда апелляциялық сот 12 жастағы қызды зорлаған үш жасөспірімнің жазасын ауырлатты, деп хабарлайды Orda.kz тілшісі.

Биыл маусым айында кәмелетке толмағандарға қатысты үкім шыққан болатын. Олар Қылмыстық кодекстің 120 және 121-баптары бойынша кінәлі деп танылып, әрқайсысы жеті жыл сегіз айға бас бостандығынан айырылған.

Зұлымдық жасап, бейнежазбаға түсірген

Бір жыл бұрын жәбірленушінің анасы Orda.kz редакциясына хабарласып, болған оқиғаның ауыр да жан түршігерлік жайларын баяндап берген. Айтуынша, көрші тұрған жасөспірімдер қызын бірнеше мәрте зорлап, мұның бәрін телефонға түсірген. Соған қарамастан, полицияға арызданғаннан кейін де күдіктілер біраз уақыт бойы бостандықта жүрген.

Оқиға жария болғаннан кейін ғана іс алға жылжыды.

«Сіздерге айтар алғысым шексіз. Егер сіздер араласпағанда, әділдікке қол жеткізе алмас едім. Көрсеткен қолдауларыңыз бен жанымда болғандарыңыз үшін рахмет»,
— деді үкім жарияланғаннан кейін жәбірленуші қыздың анасы Orda.kz журналистеріне. 

Қылмыс жасалған кезде күдіктілердің жасы 14 пен 16 арасында болған. Сот процесі жеті айға созылды