Таразда сәбилерді саудалады деген күдікпен екі медицина қызметкері ұсталды

Тараз қаласының прокуратурасы Жамбыл облысы полиция департаментінің ұйымдасқан қылмысқа қарсы күрес басқармасымен бірлесіп, қала аумағында жүргізілген жедел-іздестіру іс-шаралары барысында жаңа туған нәрестелерді сату фактісін анықтады.

Қалалық прокуратураның хабарлауынша, аталған факті бойынша 2023 жылдың 12 қаңтарында ҚР Қылмыстық кодексінің  135- бабы бойынша сотқа дейінгі тергеу басталды. 

Тараз қалалық көпсалалы ауруханасының екі медицина қызметкері ұсталды.

«Бұл тұлғалар ҚР Қылмыстық-процестік кодексінің 128-бабына сәйкес уақытша ұстау изоляторына қамалды. Қылмыстық істің тергелуі қалалық прокуратураның бақылауында» делінген Тараз қаласы прокуратурасы баспасөз қызметінің хабарламасында.