Таразда қаңтар оқиғасының екі қатысушысы рақымшылықпен босатылды

Қанды қаңтарда әлеуметтік желіде жаппай тәртіпсіздікке шақырған екі азамат нақты жазаға тартылуы керек еді. Бірақ оларға рақымшылық жасалды.

Жамбыл облысы Тараз қаласы №2 соты судьясы Ербол Дүйсенбаевтың төрағалық етумен 26 және 29 жастағы Жамбыл облысы тұрғындары «Рақымшылық жасау туралы» Қазақстан Республикасының 2022 жылғы 2 қарашадағы №152-VII Заңының 3-бабының 1-тармағы негізінде ҚК-нің 272-бабының 3-бөлігімен қылмыстық жауаптылықтан босатылып, оларға қатысты қылмыстық іс тоқтатылды.

Екі азамат қылмыстық кодексінің 272-бабының 3-бөлігінде бойынша көзделген қылмыстық құқық бұзушылықты, яғни билік өкiлдерiнiң заңды талаптарына  бағынбау, сондай-ақ жаппай тәртіпсіздіктер мен  азаматтарға күш қолдануға шақырған.

«Айыпталушылар өздеріне тағылған айыптарды толығымен мойындап, шын жүректен өкінетіндерін білдірді. Сотта іске қатысушылардың пікірі тыңдалды. Прокурор рақымшылықты қолдануға қарсы болған жоқ» деп түсіндірді сот.

Ер адамдар әлеуметтік желіде тәртіпсіздік тудырды, биліктің заңды талаптарына белсенді түрде мойынсұнбады және билікке қарсы күш қолдануға шақырды деп айыпталғаны белгілі.

Авторы: Исламбек Дастан