Таразда оқушы қызды зорлау ісі бойынша тергеу жұмыстарын жылы жабуға тырысты

Прокуратура Таразда 12 жасар қызды зорлау фактісі бойынша тергеуді қайта бастады. Бұл туралы Orda.kz тілшісіне жәбірленушінің анасының адвокаты айтты.

Жақында бізге Тараз қаласының тұрғыны хабарласып, 12 жасар қызының топтасып зорлау құрбаны болғанын айтты. Оның айтуынша, көрші жасөспірімдер мектеп оқушысына бірнеше рет жыныстық сипаттағы зорлық-зомбылық жасап, оқиғаның барлығын видеоға түсіріп алған. Мұны білген ана полицияға арызданған.

Зардап шеккен тараптың адвокаты Әлия Арзымбетованың айтуынша, қылмыстық  сараптама қорытындысын күтпестен іс екі рет қысқартылды.

«Біз қылмыстық істі тоқтату туралы қаулы бар іс материалдарымен таныстық. Қылмыстың дәлелі жоқ деген сылтаумен іс екі рет тоқтатылды. Алайда прокуратура бұл шешімдердің күшін жойып, тергеу ісі қайта жалғасты. Жәбірленушінің анасы мұның барлығын құжаттарды оқығаннан кейін ғана білді», - деді заңгер.

Бала құқықтары жөніндегі уәкіл Динара Зәкиева жағдайға назар аударды. Ол оқушы қыздың анасымен жеке хабарласып, көмек көрсетті.

Полиция ҚР Қылмыстық кодектің 120-бабының 4-бөлігі («Кәмелетке толмаған адамға қатысты бір топ адамдар жасаған зорлау») бойынша істі тергеп жатыр. Бұл өмір бойына бас бостандығынан айыруға дейін жазаланатын ауыр қылмыс.

Қазір жәбірленушімен психологтар жұмыс істеп жатыр. Қыздың анасы іс сотқа жеткізіліп, кінәлілер лайықты жазасын алады деп үміттенеді.

Орда.kz редакциясы оқиғаларды бақылайтын болады.