Таразда мектеп оқушысы балаларды өрттен құтқарды

Тараз қаласындағы №54 мектептің 10-сынып оқушысы Қадырәлі Қыздарбек ерлік жасады, деп хабарлайды Orda.kz.

15-ықшамаудандағы көпқабатты үйдің бір пәтерінде болған өрт кезінде ол бөлмеден түтінге тұншыққан екі кішкентай баланы аман-есен алып шыққан.

Куәгерлердің айтуынша, Қадырәлі достарымен бірге сабақтан қайтып келе жатып, бесінші қабаттың терезесінен қою түтін шығып жатқанын байқап қалған. Сол сәтте тұрғындар үрейленіп,  сыртқа жүгіріп шығып жатқанда ол көп ойланбастан үйге кіріп кеткен.

«Іште екі бала болды: біреуі бесікте, екіншісі қасында. Қадырәлі екеуін де сыртқа алып шығып, үлкендерге тапсырды. Кейін пәтерде басқа ешкім қалмағанына көз жеткізу үшін қайта кіріп шықты. Мұның бәрі өрт сөндірушілер келгенге дейін болды», – дейді көршілер.

Құтқарушылар жеткен кезде, Қадырәлі тек сөмкесін алып, ешкімге айтпастан үйіне кетіп қалған.