Таразда көшелерді жөндеуге бөлінген қаражатты жымқырған шенеуніктер 8 жылға сотталды

Тараз прокуратурасы қала көшелерін жөндеуге бөлінген бюджет қаражатының талан-таражға түскенін анықтады.

Тараз әкімдігінің тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы З.Тұрсынұлы және «АлматыМонтажСтрой» ЖШС директорының орынбасары Е. Шлеев қала көшелерін орташа жөндеу жұмыстарын жүргізу кезінде 34,2 млн теңге бюджет қаражатын жымқырған.

Осы факті бойынша Тараз прокуратурасы Қылмыстық кодекстің 189-бабы 4-бөлігінің 2-тармағы (жымқыру) бойынша қылмыстық іс тіркеп, облыстық прокуратура тергеп-тексерді.

Сотқа дейінгі тергеп-тексеру барысында мемлекетке келтірілген залал толық көлемде өтелді.

«Тараздың №2 сотының 2024 жылғы 5 ақпандағы үкімімен З.Тұрсынұлы мен Е.Шлеев Қылмыстық кодекстің 189-бабы 4-бөлігінің 2-тармағымен кінәлі деп танылып, 8 жылға бас бостандығынан айырылды» делінген Жамбыл облысының прокуратурасы таратқан хабарламада.

Үкім заңды күшіне енген жоқ.