Таразда алып қыз дүниеге келді

Жамбыл облыстық көпсалалы ауруханасының перинаталдық орталығының дәрігерлері сәбидің дүниеге келуіне көмектесті, деп хабарлады Жамбыл облысы әкімдігінің денсаулық сақтау басқармасының баспасөз қызметі.

19 сәуір күні сағат 09:45-те Жамбыл облыстық көпсалалы ауруханасының перинаталдық орталығының қабылдау бөліміне жүкті әйел толғақпен түскен.

«Дәрігерлердің тексеруінен кейін бірден кеңес ұйымдастырылып, онда босану әдісіне қатысты мәселе шешілді. Толғақ кезінде нәресте басымен емес, жамбас жағымен келген, сонымен қатар барлық көрсеткіштер бойынша дүниеге келетін сәбидің ірі екені алдын ала белгілі болған.

Сарапшылардың пікірінше, кейде ірі салмақтағы балалар да табиғи түрде туылып, бәрі жақсы өтеді, бұның бәрі ананың жеке жағдайы мен денсаулығына байланысты.

Бірақ бұл нақты жағдайда нәрестенің салмағы ірі, сондай-ақ ананың метаболикалық синдромы қиындық тудырды» деді облыстық денсаулық сақтау басқармасының баспасөз қызметі.

Дәрігерлер әйелге жедел түрде кесарь тілігі жасау туралы шешім қабылдады.

«Сағат 10:46-да салмағы 5 келі, бойы 62 сантиметр қыз бала дүниеге келді. Мұндай нәрестені алып деп атайды. Операцияны ұйымдастыру-әдістемелік бөлімінің басшысы Бағдат Нұрмахан мен қабылдау бөлімінің меңгерушісі Ақерке Тоқбергенова жасады» деп хабарлады басқармада.

Дәрігерлердің айтуынша, ота сәтті өтті, ана мен баланың жағдайы жақсы.