Таразда 18 жыл бойы мемлекетаралық іздеуде болған шетелдік азамат ұсталды

Таразда Өзбекстан азаматы ұсталды. Оған 2006 жылы қасақана кісі өлтірді деген айып тағылған.

Жамбыл облысы полиция департаментінің экстремизмге қарсы күрес басқармасы қызметкерлері Қазақстан шекарасын заңсыз кесіп өткен шетелдік азаматты ұстады. Оның 18 жыл бойы мемлекетаралық іздеуде жүргені белгілі болды.

«Ер адам 2006 жылы көрші мемлекет аумағында қасақана кісі өлтіргені үшін мемлекетаралық іздеуге жарияланғаны анықталды. Шетелдікке қатысты қамауға алу түріндегі бұлтартпау шарасы таңдалды. Оны экстрадициялау мәселесі қозғалды. Өзбекстан Республикасы аумағында қылмыстық жауапкершілікке тартылу мәселесі шешілуде» деп хабарлады ІІМ баспасөз қызметі.

Тергеу мүддесімен басқа ақпарат жария етілмейді.