Таразда 10 жасар бала ауыр қылмысты ашуға көмектесті

Таразда 10 жасар бала полицейлерге ауыр қылмысты ашуға көмектесті, деп хабарлайды Orda.kz. 

Тараз қалалық полиция басқармасының мәліметінше, ер адамды үйінің жанында белгісіз біреу пышақтап кеткен. Ер адам қалалық аурухананың жансақтау бөліміне жеткізілді. Денсаулыққа қасақана ауыр зиян келтіру бабымен сотқа дейінгі тергеу басталды.  

Оқиға орнына жедел жеткен полиция қызметкерлері тергеу іс-шаралары барысында қылмыстың куәгерін тапты. Жақын жерде ойнап жүрген 10 жасар бала қылмыстың куәсі болған. Ол полицейлерге күдіктінің киімі, келбеті, қайда қашқаны туралы маңызды ақпаратты нақтылап айтып берді. Оқушының қырағылығының арқасында полиция қызметкерлері күдіктіні ізін суытпай ұстаған.