«Тараз және түркі өркениеті» ғылыми конференциясы өтті

Тараз Орталық Азиядағы ең көне қалалардың бірі – Түркі өркениетінің ошағы екенін айғақтайтын тарихи негіздер көне шаһарда жетерлік.

Жамбыл облысы әкімдігінің ұйымдастыруымен өткен «Тараз және түркі өркениеті» атты халықаралық ғылыми конференциясын осы орайда ой қозғалды. Жиынға АҚШ, Түркия, Жапония, Өзбекстан, Қырғызстаннан келген ғалымдар қатысты.

Аймақ басшысы Бердібек Сапарбаев ұлттық құндылықты дәріптеу, жалпытүркілік өркениеттің мәдени дамуы мен тарихи өркендеуіне өлшеусіз үлес қосатынын атап өтті.

— Қазақ жерінде Жібек жолынан бері барлық карталарда келе жатқан екі қала бар. Бірі Тараз қаласы, екіншісі Жаркент. Елімізде ЮНЕСКО-ға енетін 11 объекті болса, соның бесеуі Жамбыл облысында орналасқан, - деді Бердібек Сапарбаев.

Парламент Мәжілісінің депутаты Берік Әбдіғалиұлы Тараздан шыққан белгілі Таразилерді түгендеп, олардың есімдері мен еңбектерін ұрпаққа жеткізу керек деді. Сондай-ақ балбалтастар музейін ашуды ұсынды.

Халықаралық Түркі академиясының Президенті, тарих ғылымдарының докторы Дархан Қыдырәлі ежелгі және кейінгі замандағы түркі ұрпақтары арасындағы сабақтастықты одан әрі нығайтудың жалпы ұлттық мақсаты – Ұлы Дала елін Мәңгілік елге айналдыру екендігін айтты.

АҚШ-тан келген тарих ғылымдарының докторы, профессор Юлай Шәмілоғлы Қытай саяхатшысы Суан Цяньның 7-ғасырда Әулиеата өңірінде болып, жүргізген зерттеулерінен құнды мәліметтер келтірді. Жапон ғалымы Садакатцу Кунитаке  Жамбыл өңірінде жүргізген экспедициясынан ақпарат бөлісті.