Тараз қаласының әкімдігі тендерсіз 3,5 млрд теңгеге келісімшарт жасады

Шілде айының соңында ҰҚК Тараз қаласы әкімдігінің тұрғын үй-коммуналдық шаруашылық, жолаушылар көлігі және автомобиль жолдары бөлімі басшысының міндетін атқарушы Мақсат Нұржановты 1 млн 200 мың теңге пара алу кезінде ұстады. Orda.kz тілшісі қалалық әкімдіктің тұрғын үй-коммуналдық шаруашылық бөлімі жасаған келісім-шарттарды мемлекеттік сатып алу порталында сараптап, қызық жайттарды анықтады.

Ең бірінші жабдықтаушылар тізімінде Тараз қаласы, Бөлтірік шешен, 23 мекен-жайындағы 3 жолақ көзге түсті. Бұл жерде «Ерік Астана» ЖШС (58 миллиондық келісім) мен «Каз ин Капитал» ЖШС (468 миллиондық келісім) тіркелген. Соңғысының басшысы Мамыров Еркін Сейджапарұлы. Ол Тараз қалалық тұрғын үй-коммуналдық шаруашылық бөлімінен 686 млн теңгені тендерсіз жеңіп алған тағы бір ЖШС – «ИнвестКонстракшн» ЖШС- нің басшысы ретінде көрсетілген.

Сондай-ақ, бір көзден алу әдісімен бірнеше келісім-шарттар жасалған:

• «Алматы Монтаж Строй» ЖШС 464 млн теңгеге;
• Төлебаев Талғат дара кәсіпкер (ДК) 77 млн.теңгеге;
• «Ғимарат Строй com» ЖШС 128 млн теңгеге;
• 112 млн теңгеге «Самұрық Тараз» ЖШС;
• 100 мың теңгеге «KazNova inc» ЖШС;
• «SUCCEED» ЖШС 85 млн теңгеге;
• Нұрбаев ДК 66 млн теңгеге;
• 19 млн теңгеге «Бастау тур» ЖШС;
• «МК Түйте Сүй» ЖШС 179 млн теңгеге;
• 185 млн теңгеге «Әулие ата» ДК;
• «Азбука света» ЖШС 48 млн теңгеге;
• 12 млн теңгеге «Рахымбеков Нұрсұлтан» ДК;
• 30 млн теңгеге «Ая технологи» ЖШС.

Ал тағы 12 компаниямен жасалған келісімнің жалпы сомасы 420 млн.теңге.

Еске салсақ, тұрғын үй-коммуналдық шаруашылық бөлімінің басшысы Зият Тұрсынұлы да сыбайлас жемқорлыққа байланысты қылмыстық іске қатысты. Инсайдерлік ақпаратқа сәйкес, антикор қызметкерлері оны департаментте болып жатқан оқиғалар туралы толық мәлімет берген Мақсат Нұржанов арқылы ұстаған. Енді міне, былтыр қаза тапқан офицерлерге ескерткіш ашуға атсалысқан Мақсат Нұржановты ҰҚК қамауға алды.

Авторы: Исламбек Дастан