Тараз қаласындағы  бағдаршам нысандарын күтіп ұстау  қызметі бойынша дау туды

Тараз қаласындағы бағдаршам нысандарына  қызмет көрсетіп жүрген компания араша сұрауда. Компания Тараз қаласы әкімдігімен конкурс жеңімпазы анықталғанға  дейін бағдаршам нысандарын  тегін  күтіп ұстау мен қызмет көрсетуге уағдаласқан.

2022 жылға арналған Тараз қаласының бағдаршамдарын  ағымдағы жөндеуге, күтіп-ұстауға, орнатуға және қалпына келтіруге арналған қызметтер, жол белгілері мен белгілеулерге қызмет көрсету және оларға  ағымдағы жөндеу, жарық диодты шамдармен  жарықтандырылған  белгілер орната отырып, реттелмейтін жаяу жүргіншілер өткелдерін жайластыру (4 нысан), қолданыстағы жол қозғалысы детекторларын (16 нысан) пайдалана отырып, бейімделген басқарылатын жол қиылыстарындағы көлік ағындарының мониторингі, жасанды кедергілерді (700м) орнату, жол белгілерін дайындау және орнату бойынша 83 млн теңгеге  конкурс жарияланған.

Конкурстық комиссия шешімімен  «СтройМонтажGroup» ЖШС-і  жеңімпаз атанған. Бірақ конкурс жеңімпазы анықталса да, конкурс өтпеді деп танылды. 

Оған  Қаржы министрлігі ішкі мемлекеттік аудит комитетінің Жамбыл облысы бойынша ішкі мемлекеттік аудит департаментіне жіберілген хатындағы  «Департаментке шағымда көрсетілген уәждер бойынша растаушы құжаттарды қоса дәлелді жауап берулеріңізді сұраймын» деп көрсетілген сөздері негіз болған.

«СтройМонтажGroup»  ЖШС басшысы Қожағұл Абылай «конкурс әкімнің ұнатқан қызмет жеткізушісімен емес, бәсекелестік орта ашық конкурс арқылы жеңімпаз атанғандармен жұмыс істеуі керек» деп отыр.

Оның бұл іске өз айтары бар болып шықты.

— Қаланың жол қозғалысы бірде бір минут тоқтаған емес, соңғы үш айда тегін қызмет көрсете отырып, жеңімпаз болып табылсақ та, «ойдан шығаралған»  әдістермен келісімшартқа қол қоймауға барлық әрекет жасалуда. Сол себепті  ішкі аудит департаментінің шешімін күтпестен,  әкімдік конкурсты тоқтатып отыр,- дейді Қожағұл Абылай.

Тараз қаласында  соңғы үш айда тегін қызмет көрсетіп жүрген  «СтройМонтажGroup»  ЖШС басшысы  құзырлы және құқық қорғау органдарына аталған келеңсіздіктерді көрсетіп  хат жазғанын хабарлады.  

Сонымен қатар аталған мекеме басшысы ашық дереккөздерден алынған мәлімет бойынша, осы уақытқа дейін Тараз қаласында бағдаршамдарды күтіп ұстау және қызмет көрсетумен үздіксіз «СМЭУ-Автотранссигнал-2»  ЖШС  айналысқанын және  олар жылына кемінде 200 млнға жуық келісімшартқа қол жеткізіп отырғандығын  алға тартады.

Тараз қаласы, Исламбек Дастан.