Тараз әлемдік қолөнершілер қалаларының тізіміне енді

Тараз әлемдік қолөнершілер қалаларының тізіміне енді, деп хабарлайды Жамбыл облысы әкімінің баспасөз қызметі.

— Тараз – қолөнершілер қаласы» халықаралық көрмесінің киелі Әулиеата топырағында өтіп жатқанына шын жүректен қуаныштымын! Бүгін біз Тараздың әлемдік қолөнершілер қалаларының тізіміне ресми түрде енгізілгеніне куә болып отырмыз. Бұл тізімге Тараз үлкен туристік және қолөнер әлеуеті арқасында енді, - деді облыс әкімі Нұржан Нұржігітов.

Дүниежүзілік қолөнершілер қалаларының тізімі 2014 жылдан бері қалыптасып, Самарқанд, Бұхара, Хиуа, Қоқан сияқты әлемнің елуден астам қалаларын қамтиды. Қасиетті Тараз – Қазақстанның осы тізімге енген алғашқы қалаларының бірі.

— Облысымызда туризмді дамыту мақсатында ауқымды шаралар өткізу жоспарлануда. Осы бағытта жұмыс істеуге ниетті кәсіпкерлерге қолдау көрсетілуде, - деді әкім.

Облыста 3435 тарих және мәдениет ескерткіштері болса, оның бесеуі ЮНЕСКО-ның Бүкіләлемдік мәдени мұралар тізіміне енгізілген, 25-і республикалық, 698-нің жергілікті маңызы бар.