Тараз әкімі сот шешімін орындамағаны үшін айыппұл арқалады

Құрылыс және әрлеу материалдарын шығаратын зауытқа апаратын жолды жөндеу жұмыстары туралы сот шешімін орындамаған Тараз әкімі Бақытжан Орынбековке 250 мың теңгеге жуық айыппұл салынды.

Тараз қаласы әкімі мен Меркі ауданының әкіміне айыппұл салынды. Бұл туралы Әкімшілік істер жөніндегі сот алқасының төрайымы Динара Нұрлыбаева мәлімдеді. Оның айтуынша, екеуі де сот билігіне бағынбаған. Меркі әкімі сот шешіміне мән бермегені (сотқа шақырылған, бірақ келмеген) үшін 69 мың теңге айыппұл төлейтін болды.

Ал тараздық шенеунік болса, сотқа мүлде бағынбағанымен қоймай, орган шешіміне пысқырмаған да. Оқиға құрылыс және әрлеу материалдарын шығаратын ЖШС зауытына апаратын жолға қатысты сот ісін жүргізуден басталды.

Компания сотқа шағым түсіріп, қала әкімдігіне жолды мемлекет есебіне алуды және жөндеуді талап еткен. Сот компания пайымының дұрыстығын ескеріп, әкім Орынбеков қала бюджеті есебінен де жолды жөндеуі керек деп шешті.

«Алина Групп» ЖШС-нің арызына қатысты Тараз қаласының әкіміне және «Тараз қаласы әкімдігінің тұрғын үй-коммуналдық шаруашылық, жолаушылар көлігі және автомобиль жолдары бөлімі» ММ-не 2021 жылғы 24 қыркүйектегі сот шешімін орындамуына: автомобиль жолын мемлекеттік тіркеуге, тиісті техникалық жай-күйіне және орташа жөндеу жұмыстарын ұйымдастыруда шара қолданбауына, яғни көрсетілген заңсыз әрекетсіздікке байланысты жолды орташа жөндеу жұмыстарын ұйымдастыру туралы сот шешімін міндеттеу, сондай-ақ сот шешімін орындамағанына байланысты Тараз қаласының әкіміне ақшалай айыппұл салынсын» делінген құжатта.

Бірақ қала әкімі белгісіз себептермен сот шешімін осы күнге дейін орындамай, ол үшін тағы 70 АЕК (241 500 теңге) көлемінде айыппұл салу туралы екінші сот шешімін алған.

Дегенмен екі әкімнің де аталған айыппұлды төлегені белгілі болды. Бұл ретте, сот жүйесі арқылы 2023 жылдың 1 жартыжылдығында жалпы сомасы 1 345 500 теңгеге 11 ақшалай айыппұл салынып, оның ішінде 759 000 теңгеге 8 сот актісі орындалғаны атап өтілді.

Сонымен қатар ақшалай айыппұл Сарысу ауданы Игілік ауылдық округінің әкіміне, «Жамбыл облысы әкімдігінің ауыл шаруашылығы басқармасы» КММ-не, «Тараз қаласы әкімдігінің тұрғын үй-коммуналдық шаруашылық, жолаушылар көлігі және автомобиль жолдары бөлімі» ММ-не де салынды.

Авторы: Исламбек Дастан