Танымал журналист Қазис Тоғызбаев өмірден өтті

28 ақпанда Азаттық радиосының тілшісі Қазис Тоғызбаев  Алматыдағы коронавирус ауруханасында қайтыс болды. Ол 72 жаста еді. Марқұмнан  25 қаңтарда короновирус анықталып, ауруханаға жатқызылған. Оны 22 ақпанда клиникадан шығарған, кейін халі ауырлап қайта ауруханаға түскен. Бүгін  жақындары оның жүрегі тоқтағанын хабарлады.

Тоғызбаев 2008 жылдың қыркүйегінен бастап  Азаттық радиосының Қазақ қызметінде тілші қызметін атқарған.

Запастағы полковник Қазис Тоғызбаев әскери қызметінен соң журналистикаға бет бұрып, фотографиямен де айналысқан. Оппозициялық «Сөз» және «Азат» газеттерінде қызмет еткен. kub.info сайтында блог жүргізіп, Алматы маңындағы Шаңырақтан жұртты күштеп көшіру жайлы фоторепортаждар жариялаған.

Қазис Тоғызбаев 2007 жылы қаңтарда Қазақстандағы демократиялық құндылықтарды дамытуға қосқан үлесі үшін «Азаттық» сыйлығымен марапаттаған. Ол Азаттықтың Қазақ қызметінде көбіне саяси, адам құқығы, әскери тақырыптарға  жазды.

Ол 2011 жылы желтоқсанда Жаңаөзенге журналистердің ішінен алғашқылардың бірі болып  барған. Қазис аға Маңғыстау облысынан объективті репортаждар таратып, Жаңаөзенде не болып жатқанын дер кезінде хабарлап отырған.

Қазис ағаның «Заманбек Нұрқаділовтің өлімі. Үш рет атылған оқ және режимді сақтап қалу жолы», «Арон Атабектің қапаста өткізген 14 жылдағы алғашқы өтініші», «Сайлаудан кейінгі бір жыл. Тоқаев Назарбаевтың көлеңкесінен шыға алды ма?», «Совет кезінде қуғындалып, Назарбаев тұсында диссидентке айналған Кәрішал Асанов» сынды мақалаларын оқырман тарапынан көп оқылып, талқыланған.

ORDA редакциясы Қазис Тоғызбаевтың отбасы мен жақындарына қайғырып, көңіл айтады.