Танымал жазушы Әкім Тарази дүниеден өтті

Қазақстандық жазушы, драматург, сценарист Әкім Тарази өмірден озды, деп хабарлайды Orda.kz.

Бұл туралы Қазақстан жазушылар одағының баспасөз қызметі мәлімдеді.

«Қадірлі ақсақалымыз Әкім Тарази өмірден озды. Қонақасы мен жерлеу рәсіміне қатысты ақпарат қосымша хабарланатын болады», — деп хабарлады жазушылар одағы.

Әкім Уртайұлы Әшімов (әдеби бүркеншік есімі – Әкім Тарази) — 1933 жылы Алматы қаласында дүниеге келген. Ол бүкіл саналы ғұмырын қазақ әдебиеті мен мәдениетінің дамуына арнады. Еңбек жолын мұғалімдіктен бастап, алғашқы туындыларын «Ара» журналында жариялаған. 1999 жылы Қазақстанның еңбек сіңірген қайраткері, 2021 жылы Қазақстанның Еңбек Ері атағын алған. Сонымен қатар әдебиет және өнер саласындағы ҚР мемлекеттік сыйлығының лауреаты.

Әдебиеттегі алғашқы қадамы — 1966 жылы жарық көрген «Құйрықты жұлдыз» повесі. Кейінірек ол «Қара жұлдызға жол», «Қасірет», «Москва — Баласағыз» романдарын, «Күлкісіз комедия», «Жақсы адам», «Жолы болғыш Бүкен» пьесаларын жазды. Сонымен қатар «Іздер көкжиекке кетеді», «Қараш асуындағы атыс», «Ләйләнің тілегі» фильмдерінің сценарий авторы атанды.

Мемлекет басшысы Қасым-Жомарт Тоқаев жазушының отбасы мен жақындарына көңіл айтты.

«Әкім Тарази бүкіл саналы ғұмырын сөз өнеріне арнаған, төл әдебиетіміз бен мәдениетімізді төрге оздырған ұлтымыздың біртуар перзенті еді. Дарынды қаламгер қазақ прозасының көкжиегін кеңейтті, ұлттық кино және драматургия саласына өлшеусіз үлес қосты. Асыл мұратынан ешқашан айнымаған қалам иесін көзі қарақты оқырман «Әдебиет әлемінің Әкімі» деп ардақ тұтты, зиялы қауым оның шығармашылығымен қатар адамгершілік қасиеттерін ерекше бағалады. Өнегелі өмір сүріп, соңына мол мұра қалдырған Әкім Таразидің жарқын бейнесі халқымыздың жүрегінде мәңгі сақталады», — деп жазды президент жеделхатында.