Танымал гитарист Ақсұңқар Қайрат Нұртасқа ренжулі екенін айтты

Әлеуметтік желіде танымал болған музыкант Ақсұңқар Жүнісбаев Қайрат Нұртасқа деген ренішімен бөлісті.

Ол Taboo бағдарламасында Қайрат Нұртастың «Сені сүйем» әнінің қайырмасын жазғанын және оны әнші еш жерде айтпайтынына налыды.

Расында да гитарист әншімен жиі әлеуметтік желіде шығып тұрады.

«Әннің қайырмасын мен жаздым. Бірақ ол көп жерде айтылмайды. Осы нәрсеге өкпелеп қалдым. Қайрат аға екеуміз отырдық, қасымызда Олжас аға бар. Осы ән тура осылай шықты. Таксиде Аргоня келе жатқан. Дәл ән шыққанда, Қайрат аға екеуміз әнді айтып, видео түсірдік. Аргоняға «мәтін жаз» деп жіберді. Келгенше екі шумақ, бір қайырманың сөзін жазып тастаған. Соған риза болдым. Келгеннен кейін екеуіне де ұнап қалды» деді музыкант.

Ақсұңқардың айтуынша, Қайрат Нұртас әннің авторы ретінде кез келген жерде өзін көрсетеді екен.

«Бірақ ең тәтті жерін мен шығардым ғой деген нәрсе ішімде қалып кетті. Айта алмайсың да оны, көңілін қимайсың. Қайрат аға жеке өзіміз отырғанда: «Бұл әнді Ақсұңқар бауырым екеуміз шығардық» деп айтады. Ал басқа жерлерде «әнін өзім жазғанмын» дейді. Көремін де, мақұл деп ренжімеймін. Өзім жақсы көретін ағам, - деді Ақсұңқар.