Танымал блогерлер мектеп директорынан ақша бопсалауға тырысты

Сайрам аудандық прокуратурасы басшылығымен арнайы жедел іс-шаралар жүргізіліп,  барысында полицейлер ақша бопсалаған екі азаматты ұстады.

Түркістан облысы прокуратурасы баспасөз қызметінің хабарлауынша, екі танымал блогер жергілікті мектеп директорынан оның іскерлік беделіне нұқсан келтіреміз деп қорқытып, Facebook әлеуметтік желісіндегі компроматты өшіргені үшін 100 мың теңге талап еткен.

«Осы оқиғаға қатысты ҚР Қылмыстық кодексінің 194-бабының 2-бөлігі бойынша сотқа дейінгі тергеп-тексеру жұмыстары басталып, күдіктілер екі ай мерзімге қамауға алынды» деп 13 маусымдағы мәлімдемесінде қадағалау органы хабарлады.

Іс бойынша қосымша мәліметтер Қазақстан Республикасы Қылмыстық іс жүргізу кодексінің 201-бабына сәйкес жарияланбайды.