Тамара Дүйсенова Ербаян Мұхтардың еміне неге ақша халықтан жиналғанын түсіндірді

Әскерде жарақат алып мүгедек болып қалған сарбаз Ербаян Мұхтардың еміне қазақстандықтар не үшін ақша жинады деген сауалға үкімет басшысының орынбасары Тамара Дүйсенова жауап берді, деп хабарлайды Orda.kz.

Сарбаз Ербаян Мұхтардың еміне деп қазақстандықтар қомақты қаражат жинаған болатын. Осы орайда неліктен мемлекеттік тиісті ем-шара көрсетілмеді деген сауалға Тамара Дүйсенова Ербаянның ата-анасы мемлекет қандай көмек көрсетуге міндетті екенінен хабарсыз болғандығын айтты.

«Бұл жерде олар өз құқықтары жайлы ақпаратты толық білмеді. Егер мемлекеттен қандай көмектің тегін көрсетілетіндігін білгенде кез-келген көмекті жедел түрде алатын еді», — деп қысқа қайырды Дүйсенова.

Сонымен қатар, брифингте денсаулық сақтау министрі Ақмарал Әлназарова сарбазға дәрігерлердің қандай көмек көрсеткенін айтты.

«Науқасқа тиісті ота жасалды. Операциядан кейінгі кезеңде 26 күн бойы оңалту шаралары да тиісті түрде өткізілді. Дәрігерлердің рұқсатымен әрі ұсыналған ем-шаралармен науқас үйіне шығарылды. Қазір оған қажетті медициналық көмек көрсетілуде. Біз сарбаздың анасымен хабарластық, қазір Ербаянды оңалту орталығына дайындап жатыр», – деді Әлназарова.

Сондай-ақ министр Ербаян Мұхтарға еліміздегі қажетті медициналық көмектің барлығы тегін көрсетілетінін баса айтты. Бірақ шетелде оңалтуға келетін болсақ, ол ата-анасының таңдауы және оны сарбаздың өзі төлейтіндігін айттты.