Тамағына пышақ сұқты: Шымкентте ер адам бұрынғы әйелін өлтірмек болды

Шымкентте ер адам бұрынғы әйелінің тамағына пышақ сұғып, жұлынына зақым келтірді, деп хабарлайды Orda.kz

Шымкентте ер адам бұрынғы әйелі -  33 жастағы Ақмаралға пышақ ұстап шабуыл жасаған. Болған оқиға жайлы адвокат Жанна Оразбақова хабарлады. Күйеуі оның тамағын кесіп, жұлынға зақым келтірді. Әйел аман қалғанымен, енді жүре алмайды. 

«Жақында Шымкентте ер адам бұрынғы әйелі, 4 баласының анасын аңдыды, оның тамағына пышақ сұқты. Ол аман қалды, бірақ Ақмаралдың жұлынына зақым тиді. Демек, ол ешқашан жүре алмауы мүмкін!» деп жазды Жанна Оразбақова.

Жәбірленуші  әйелдің сіңлісі Мәншүк Бубеева алғашында іс қозғалмағанын айтты. Оның сөзінше, бұрынғы күйеуі тек зорлық көрсетіп қана қоймай, сонымен қатар пышақ сұғып жарақаттап, бүкіл отбасын қорқытқан.

«Алдымен өзім шешемін деп ойладым. Бірақ іс қозғала қойған жоқ, мен адвокат жалдағаннан кейін ғана іс жүрді. Сол кезде ғана әпкемнің күйеуіне іздеу салынды. Бірақ ол өз тамырын кескен еді. Кінәсін мойындамайды, «Иә, ұрдым, бірақ пышақ сұғып жарақаттаған жоқпын, ол өзі құлады» дейді. Ол оны қорқытып, «өлтіремін» деген хабарламалар жазды. Біздің ата-анамызға да қоңырау шалып, оларды өлтіретінін айтты. Әкеміз 102-ге қоңырау шалып, арыз жазды, бірақ олар ештеңе істемеді. Полиция қызметкерлерінің немқұрайлығы осындай жағдайға әкелді. Құдайға шүкір, ата-анамызға зиян тигізбеді», — деді Мәншүк

Зорлық-зомбылықтан бөлек, бұрынғы күйеуі әйелінің банк карталарын, құжаттарын және жеке заттарын ұрлаған.

«Күдікті ұсталып, уақытша ұстау изоляторына қамалды. Қазіргі уақытта болған оқиғаның барлық мән-жайларын анықтау үшін тергеу іс-шаралары жүргізіліп жатыр. Қылмыстық іс департамент басшылығының бақылауында», деп хабарлады полиция «Орда» редакциясының арнайы сауалына. 

Еске сала кетейік, Қызылорда облысының Тасбөгет кентінде ер адам ауруханада әйелін соққыға жығып, қабырғасын сындырған еді.