Талибандар әскери техниканы қалпына келтіретін мамандар тапты

Талибан қозғалысы (Жоғарғы Соттың шешімі бойынша, Қазақстанда бұл қозғалысқа тыйым салынған) коалиция күштерінен қалған авиациялық техниканы қалпына келтіруге көмектесетін мамандар тапқанын мәлімдеді.

Бұл туралы Orda.kz хабарлайды.

Бұл туралы Youtube платформасында бейнеролик жариялағанын Al Jazeera телеарнасы хабарлады. Телеарна журналисінің айтуынша, арнайы мамандар тобы шетелдік әскерлер қалдырған әскери техниканы қалпына келтіру жұмыстарын жүргізуде.

Мәліметтер бойынша, қазіргі уақытта Талибандар өздерінің жеке әскери-әуе күштерін құрумен айналысып жатыр. Инженерлер, авиация мамандары мен техниктер тобы ондаған ұшақтарды жөндеп қойғанын айтты. Бейнежазбадан аэродромға шашыраңқы орналасқан тікұшақтарды көруге болады.

– Тәліптер Кабулға кіргенде, бірінші кепілдік жалпы амнистия болды. Мен олардың сөзіне берік болатынына сенімдімін. Егер біз бәріміз кететін болсақ, бұл аэродромды кім сақтап қалар еді? Ауғанстанды кім басқарғаны маңызды емес, маңыздысы оның шекарасы, активтері мен ресурстарын қорғау, - деді майор Фарид Ахмад.