Талибандар мемлекеттік туды қолдаушыларға оқ жаудырды

Нангархар провинциясында «Талибан» қозғалысының мүшелері (Қазақстанда Жоғарғы Сотының шешімі бойынша қозғалысқа тыйым салынған) Ауғанстанның мемлекеттік туын қолдау митингісіне қатысушыларға оқ жаудырды.

Бұл туралы Orda.kz РИА Новостиге сілтеме жасап хабарлады.

Жергілікті ақпарат көзінің хабарлауынша, атыс салдарынан зардап шеккендер мен жараланғандар бар. Басқа мәліметтер жарияланған жоқ.

Сонымен қатар, жергілікті Ariana News телеарнасы мен Pajhwok агенттігінің журналистерін Жалалабад қаласында содырлар соққыға жыққаны хабарланды. Олар мемлекеттік туды қолдайтын наразылық акциясын түсіріп, репортаж жасамақ болған. Екі журналистің аяусыз соққыға жығылуы жергілікті БАҚ-та теріс пікір туғызды.

Еске салсақ, 15 тамызда Талибандар Кабулға кіріп, елдегі билікті өз қолына алғанын хабарлаған. Үкіметтің бір бөлігі мен президент Ашраф Ғани Ауғанстаннан қашып кетті. Кейін Ауғанстан вице-президенті өзін президент деп жариялап, Талибанмен күресуге шақырды.