Талибандар БҰҰ-н гуманитарлық миссиямен қалуды сұрады

Талибандар БҰҰ-нан елде қалып, бұрынғыша қолдау білдіріп, гуманитарлық қызметті жалғастыруды сұрады, деп мәлімдеді БҰҰ-ның Ауғанстандағы гуманитарлық үйлестірушісі Рамиз Алакбаров.

Бұл туралы Orda.kz РИА Новостиге сілтеме жасап хабарлады.

Рамиз Алакбаровтың айтуынша, БҰҰ-ның Ауғанстандағы гуманитарлық кеңсесі мен Талибан арасындағы өзара іс-қимылы 18 жылдан бері жалғасып келеді.

– Біз олармен үнемі жұмыс істеп келдік. Гуманитарлық қызметті жүзеге асыру үшін қарым-қатынас орнаттық, - деді Алакбаров.

Оның айтуынша, соңғы күндері кеңсе мен тәліптер арасында «жаңа келісімдер» болған жоқ.

– Бізде қызметтік байланыстар бар. Олар бізге әрқашан қолдау көрсететініне сендіреді. Осы жолы тағы да қолдау білдірді және осында қалып, гуманитарлық көмек көрсетуді жалғастыруды сұрады, - деді Алакбаров.

Сонымен қатар, ол аумалы-төкпелі жағдайда «барлық нәрселер анықталып, азғантай ерекшеліктерге дейін айқындалатынын» айтты.

– Бұл, ең алдымен, гуманитарлық жағдайда жұмыс істейтін әйелдердің жұмыс орнына кіруін қамтамасыз ету мәселесі, - деді Рамиз Алакбаров.

Оның айтуынша, кейбір аудандарда әйелдер осындай кедергілерге тап болады, бірақ «бәрі қай облыста командир екеніне байланысты».

– Біз әлі орталықтандырылған нұсқауларды көрмедік, - деп қосты ол.

Еске салсақ, БҰҰ-ның 141 мүшесі Ауғанстаннан Қазақстанға, атап айтқанда Алматыға әкелінген.

Талибандар - Жоғарғы Соттың шешімі бойынша Қазақстанда тыйым салынған ұйым.